Wans opan a taim, Anansi tink tu imself seh da ef im kuda kalek-op aal di Kaman sens iina di wol an kip dem fi imself, den im boun fi get nof moni an nof powa: fa ebribadiuda hafi kom tu im wid dem woris dem, an im uda chaaj dem veri dier wen im advaiz dem
Anansi staat fi kalek-op an kalek-op aal di kaman sens dem im kuda fain an pu dem iian wan big-big kalabash. Wen im don saach an saach an kudn fain nomo kaman sens, Anansi disaid se im gwai aid im kalabash ful a kaman sens pan i tap a waa ai-ai chrii wichpaat nobadi els kuda riich i.
So, Anansi tai wan ruop roun di klabash nek an tai di ruop tuu en dem tugeda an tai di ruop ruon im nek, so dat di kalabash wee res pan im beli. Anansi staat fi klaim-op di ai-ai chrii, wichpaat im wena go aid di kalabash; but im kudn klaim gud nar tuu faas fa di kalabash wean get iina im wie ebritaim im chrai fi klaim.
Anansi chrai an chrai so til aal af a sodn im ie wan vais bos out a laaf baka im, an wen im luk, im si wan likl bwaai a stan-op a di chrii ruut an a laaf an ala out, “Wat a ful-fuul man! Ef yu waa fi klaim wan chrii front wie, wa mek yu no put i kalabash bak a yu?”
Wel sa, Anansi so bex fi ie dat big piis a kaman sens kum outa di mout a soch a likl bit a bwaai aafta im wee tink seh im wee kalek aal di kaman sens iina di wol dat Anansi grab aaf di kalabash fram roun im nek an fling i dong a chrii ruut
an di kalabash brok-op iin minsiz skyata out iina di briiz aal uova di wol, an ebribadi get a likl bit a kaman sens!
Iz Anansi mek i!
Jak Manduora,mi no chuuz non!
No comments :
Post a Comment