Gad A Taak Patwa

Mi Gad!
Elp mi Maasa Jiizas!
At laas dem fain out
Se Yu taak ina patwa tu.
Yu Baibl de pan di tiep,
An dem se vagabanjri
An wotlisnis gwai mash op Jamieka
Fi gud nou!

Mi neba did nuo se
A ongl Im wait pikni dem langwij Gad spiik?
Wat a blesin Maasa Jiizas,
Se yu did baan ina animal pen
An iz di ignarant shiip faama
Di ienjel wan dem tel
An iz kliera Iijip wid yu pierents dem
Yu run go ton refujii.

Mek wi si a uu go tun
Vagaban an wotlis!
Aal a we bos di patwa
Wen we bok we tuo.
Plenti a wi baan puor laik Maasa Jiizas
A fi aal Jamieka taim nou.
Wat a preke!

E.A.A.

Source: Daily Gleaner Sept 8, 1996